Njuike navigašuvnna meattá

Badjeolbmo sadjásašveahkki

Badjeolbmo sadjásašveahki ulbmilin lea doarjut badjeolbmo barggus veadjima, dearvvašvuođa ja doaibmannávccaid.

Jos badjeolmmoš buohccá dahje bártida, de son sáhttá ordnet alccesis sadjásašveahki. Ohcamuša sadjásašveahkkerievttis seahtá guođđit Melai ovdal sadjásašveahki álgima. Mela máksá buhtadusa bálvalusa buvttadeaddjái sadjásašveahki maŋŋel.

Sosiála- ja dearvvašvuođaministeriija nanne jahkásaččat buhttenvuloš sadjásašveahkkediimmuid eanemusmeari. Sadjásašveahki sáhttá geavahit eanemustá 90 beaivvi kaleandarjagis.

Diimmut, mat buhttejuvvojit ja eanemusbuhtadus

Buhtadusa eanemusmearri dárkkistuvvo jahkásaččat bálkágerddoniin.

Jahki 2019 2020
Diimmut, mat buhttejuvvojit 200 200
Eanemusbuhtadus 17,67 euro diimmus 18,04 euro diimmus

Badjealbmáide buhttejuvvojit 200 sadjásašveahkkediimmu maiddái jagi 2020

Badjealmmái sáhttá fas oažžut buhtadusa alcces lágidan sadjásašveahkis eanemustá 200 diimmus. Álgojagi sadjásašveahkkediimmuid eanemus mearri lei 120. Diimmut, mat buhttejuvvojit, bajiduvvojedje 5.11.2020 addon ásahusain ruovttoluotta 200 diibmui das maŋŋá, go sosiála- ja dearvvasvuođaministeriija oaččui buhtadusaide lassiruhtadeami. Maiddái ovdal ásahusa fápmuiboahtima geavahuvvon diimmut buhttejuvvojit 200 diimmu rádjai, juos sadjásašveahkkevuoigatvuohta lea ohccon ovdal sadjásašveahkkebargguid álggaheami.

Juos leat geavahan sadjásašveahki badjel 120 diimmu, muhto leat ožžon buhtadusa dušše 120 diimmus

  • Mela váldá oktavuođa juohke badjealbmái, guhte lea ohcan sadjásašveahkkebuhtadusa badjel 120 diimmus, muhto buhtadus lea hilgojuvvon oasis, mii manná badjel 120 diimmu.
  • Oza buhtadusa hilgojuvvon diimmuid oasil ođđasit dutnje addojuvvon rávvaga mielde.
  • Du buhtadusohcamuš galgá joavdat Melai maŋimustá 31.12.2020.

Juos leat geavahan sadjásašveahki badjel 120 diimmu, muhto leat ohcan buhtadusa dušše 120 diimmus

  • Melas ii leat diehtu badjealbmáin, geat leat duođalaččat geavahan badjel 120 diimmu sadjásašveahki, muhto leat ohcan buhtadusa dušše 120 diimmus. Don galggat leat iešráđálaš ja bargat buhtadusohcamuša badjelmannan diimmuid oasil.
  • Fuopmáš, ahte sadjásašveahkkevuoigatvuođa lea dánge dáhpáhusas galgan ohcat ovdal bargguid álgima.
  • Buhtadusohcamuš ja badjealbmá cealkámuš galget joavdat Melai maŋimustá 31.12.2020.

Juos du buhtadusohcamuš lea boahtán Melai, muhto it leat vel ožžon buhtadusmearrádusa

  • Melas leat oktavuođas dutnje, juos leat guođđán iežat buhtadusohcamuša Melai ovdal ásahusnuppástusa fápmui boahtima.
  • Mela muitala ásahusnuppástusas ja addá dutnje vejolašvuođa dievasmahttit ohcamuša, juos leat geavahan sadjásašveahkkediimmuid eanet go leat almmuhan iežat ohcamušain.
  • Dutnje addo áigemearri, man rádjai buhtadusohcamuša galgá dievasmahttit.
  • Fuopmáš, ahte don dárbbašat maiddái boazoisida ođđa cealkámuša, vuoi boazoisit sáhttá váldit beali dasa, leatgo buhtten láhkai ohccon diimmut riekta almmuhuvvon bargguid ektui.

Ásahusnuppástusa maŋŋá dahkkon eará buhtadusohcamušain lea normála ohcanáigi, dahjege buhtadusa galgá ohcat juohke sadjásašveahkkebeaivve oasil čuovvovaš kaleandarmánotbaji loahpa rádjai. Vuođustallon sivas ohcanáiggi lea vejolaš oažžut jagi 2020 lohppii maiddái ásahusa fápmuiboahtima maŋŋá ohccon sadjásašveahkkebuhtadusaide.

Geas lea vuoigatvuohta badjeolbmo sadjásašveahkkái

Dus lea riekti badjeolbmo sadjásašveahkkái, go deavddát čuovvovaš eavttuid:

  • dus lea lágas mearriduvvon MYEL-oadju boazodoalus
  • dus leat okto dahje duinna seamma dállodoalus ássi vuollel 18-jahkásaš mánáin ovttas unnimustá 50 lohkobohcco
  • it oaččo dievas bargonávccahisvuođaealáhaga
  • it oaččo dievas ealáhaga sturrosaš veajuiduhttindoarjaga
  • it oaččo bargoealáhaga
  • du fitnodagas eai leat váttisvuođat EU:a eanadoallosuorggi stáhtadoarjjanjuolggadusaid mielde.

Lohkobohccuid mearri dárkkistuvvo ovdal sadjásašveahkkeáigodaga nannejuvvon boazologahallamis. Sáhtát almmuhit iežat ohcamušas bohccuidlogu nuppástusaid, maid bálgosa stivra lea dohkkehan.

Jos sadjásašveahkki joatkašuvvá badjel 7 beaivvi, sadjásašveahkkeohcamuššii dahje buhtadanohcamuššii seahtá laktit doaktára, buohccedivššára dahje dearvvašvuođadivššára duođaštusa du bargonávccahisvuođas.

Guođe sadjásašveahkkeohcamuša ovdal bargguid álggaheami

Sadjásašveahki sáhttá buhttet dušše, jos sadjásašveahkkeohcamuš lea ollen Melai ovdalgo go sadjásaš álggahii bargguidis.

Sáhtát ohcat sadjásašveahki juogo nu ahte

Jos sáddet ohcamuša rávdnjepoasttain, geavat suddjejuvvon rávdnjepoastta. Vállje suddjejuvvon rávdnjepoastta vuostáiváldin Badjeolbmuid sadjásašveahkki.

Sadjásašveahkkeohcamušas sehtet leat unnimustá čuovvovaš dieđut:

  • sadjásašveahkkeohcamuš
  • bargonávccahisvuohta
  • sadjásašveahki álginbeaivi
  • sadjásašveahki ohcci namma ja riegádanáigi.

Daga čálalaš sadjásašveahkkeohcamuša álo ovdal ođđa sadjásašveahki álgima. Sadjásašveahki seahtá ohcat ođđasit, vaikko sadjásašveahkis livččii ovtta beaivvi gaska. Jos seamma sadjásašveahkki joatkašuvvá boatkka haga, de ođđa sadjásašveahkkeohcamuša ii dárbbaš dahkat.

Spiehkastagat sadjásašveahkkevuoigatvuođa ohcangeatnegasvuhtii

Sierra ohcamuša it dárbbaš bargat, juos

• leat juo doaimmahan Melai duođaštusa bargonávccahisvuođas guoskevaš sadjásašveahki álggedettiin, dahje
• it leat vel doaimmahan Melai ovddit sadjásašveahkkeohcamuššii gullevaš buhtadusohcamuša.

Gii sáhttá bargat sadjásažžan

Sadjásažžan sáhttá bargat ovdabearranregistarii merkejuvvon bálvalusa buvttadeaddji, gii ii leat du bearašlahttu. Sáhtát dárkkistit YTJ:s, leago bálvalusa buvttadeaddji ovdabearranregistaris.

Du sadjásažžan ii sáhte bargat

  • náittosguoibmi dahje ovttasorru
  • du dahje du guoimmi vuollel 18-jahkásaš mánná, mánáidmánná dahje adopterejuvvon mánná, gii ássá bissovaččat duinna seamma dállodoalus
  • fitnodat, man ovdalis namuhuvvon olbmot oamastit ollásit dahje oassái.

Bargu, mii buhttejuvvo

Buhtadus máksojuvvo dakkár bargguid ovddas, maid don livččet dahkan iežat, du bearašlahtu dahje bálgosa lohkui.

Barggut sáhttet leat ovdamearkka dihte

  • bohccuid čohkken, rátkin ja njuovvan
  • bohccuid guođoheapmi
  • bohccuid gárdun ja lassebiebman
  • bohccuid mearkun
  • návdevahágiid ohcan ja návdevahágiid dustenbargu
  • bealdovahágiid eastin
  • fuođardeapmi bohccuid lassebiebmama várás
  • boazoáiddiid huksen ja divvun (jos dasa ii leat juolluduvvon almmolaš ruhtadeapmi)
  • boazobuktaga ovddosdikšun dalle, jos dan lea buktaga seailuma dáfus vealtameahttun dahkat.

Buhtadusa ohcan

Oza buhtadusa sadjásašveahki čuovvovaš kaleanddarmánotbaji loahpa rádjai. Jos sadjásašveahkki joatkašuvvá máŋga kaleanddarmánotbaji áigge, muitte ohcat buhtadusa ovddit mánotbaji sadjásašveahkkediimmuin álo čuovvovaš mánotbaji loahpa rádjai.

Deavdde buhtadanohcamuša ja sádde dan Melai.

Golut eai buhtaduvvo, jos:

  • jos du bearašlahtu livččii sáhttán bargat sadjásačča barggu,
  • barggu várás lea mieđihuvvon eará almmolaš ruhtadandoarjja,
  • bargu gullá du bargguide, go leat bargooktavuođas dahje bargogohčusoktavuođas bálgosii,
  • bargu gullá du luohttámuš- dahje hálddahusbargui dahje sullasaš bargui, dahje
  • bargu čohkiida dakkár boazobuktaga ovddosdikšumis, mii ii leat buktaga seailuma dáfus vealtameahttun.

Mela addá mearrádusa sadjásašveahkkevuoigatvuođas ja buhtadusas, mii máksojuvvo. Sáhtát ohcat mearrádussii nuppástusa, nu ahte doaimmahat Melai Davvi-Suoma hálddahusriektái čujuhuvvon váidaga.

Go buohccát dahje bártidat:

  1. Sádde sadjásašveahkkeohcamuša

    Sádde sadjásašveahkkeohcamuša Melai. Sihkkarastte, ahte ohcamuš lea ollen mearrái (omd. leat ožžon vástádusa iežat teakstadihtui).

  2. Almmut sadjásašveahki dárbbus

    Almmut sadjásašveahki dárbbus boazoisidii.

  3. Ordne sadjásačča

    Ordne alccet sadjásačča, gii lea merkejuvvon ovdabearranregistarii ovdal barggu álggaheami.

  4. Daga buhtadanohcamuša

    Daga buhtadanohcamuša, masa bivddát maid buvttadeaddji vuolláičállosa. Lavtte buhtadanohcamuššii boazoisida cealkámuša. Sádde buhtadanohcamuša Melai nu, ahte dat lea ollen dohko sadjásašveahkis čuovvovaš kaleandarmánotbaji loahpa rádjai.

Váldde oktavuođa

Oktavuohtadiedut