Badjeolbmáid sadjásašveahkkeohcamušaide ođđa delefovdnanummár 18519
Melas váldui atnui ođđa deakstasátnebálvaleapmi badjeolbmáid sadjásašveahkkeohcamušaid várás. Ođđa delefovdnanummár, gosa deakstasátneohcamušaid galgá sáddet, lea 18519.
Ođđa nummár váldui geavahussii 15.5.2023. Boares delefovdnanummár (050 410 8909) doaibmá vel jagi 2023 loahpa rádjai, muhto ávžžuhit badjeolbmáid váldit ođđa oanehisnummára dalán atnui. Ođđa deakstasátnebálvaleapmi váldui atnui ovddeš bálvaleami váilevuođaid geažil.
Čále deakstasátneohcamuššii čuovvovaš dieđuid
Deakstasániin sáddejuvvon sadjásašveahkkeohcamuš galgá sisttis doallat čuovvovaš dieđuid: gažaldagas lea sadjásašveahkkeohcamuš, goas sadjásašveahki dárbu álgá, sadjásašveahki ohcci namma ja riegádanáigi.
Ovdamearkan deakstasánis: Sadjásašveahkkeohcamuš. Dárbu álgá 3.6.2023. Beahkká Badjeolmmái 16.7.1975.
Sadjásašveahki sáhttá máksit dušše, juos sadjásašveahkkeohcamuš lea joavdan Melai ovdalgo sadjásaš álggahii bargguid.
Ohcanskovi sádden elektrovnnalaččat
Deakstasániin sáddejuvvon sadjásašveahkkeohcamuša gártat álot dievasmahttit maŋálgihtii. Danin deakstasáni buoret vuohki ohcat sadjásašveahki lea sáddet devdojuvvon sadjásašveahkkeohcanskovi Melai elektrovnnalaš áššedikšunbálvalusa boastadoaimma bakte dahje suddjejuvvon šleađgaboasttain.
Nummárii 18519 ii leat vejolaš sáddet multiamediaboasttaid. Mildosat dehe govat ovdamearkan doaktárduođaštusain eai mana dehege joavdda Melai deakstasániin. Ovdamearkan gova doaktárduođaštusas galgá doaimmahit elektrovnnalaš áššedikšunbálvalusa boastadoaimma bakte dehe suddjejuvvon šleađgaboasttain.
Amma fuobmát, ahte delefovdnanummár 050 410 8909 ii leat šat Mela anus 31.12.2023 maŋŋá. Dán nummárii sáddejuvvon ohcamušat eai mana šat Melai jagi 2024 álggu rájes.
